تحدث محمد الدماطي، عضو مجلس إدارة النادي الأهلي، عن موقف الفريق في الفترة الأخيرة والنتائج السلبية التي شهدها النادي سواء محليًا أو إفريقيًا.
وكتب الدماطي عبر حسابه الشخصي على موقع التواصل الاجتماعي "فيس بوك":"بقالي حوالي شهر ونص قافل فيسبوك وكل السوشيال ميديا تمامًا، وإمبارح بس فتحت ونزلت صورتي مع الكابتن الخطيب كنوع من الدعم الأدبي لراجل عمل كتير للنادي وبيفضل النادي على نفسه، وله فضل عليا بعد ربنا إني أكون موجود وأمثل كيان الأهلي العظيم".
وقال:"فرصة بما إن في حالة هدوء حتى لو مؤقت أقول كلمتين لعل وعسى يحصل نوع من التوضيح، وكالعادة أنا بتكلم من قلبي وبما يرضي الله ومش بزعل من أي نقد أو تجريح لأني عارف إن دي ضريبة المكان اللي أنا فيه، ولأني متأكد إن النادي الأهلي هو مصدر السعادة يمكن الوحيد لـ80 مليون بني آدم، فطبيعي يحصل زعل زي ما في أي نجاح بيحصل إشادة، ودايمًا بقول مش بعرف مهما حاولت أستخبى وقت التراجع طالما بظهر وقت النجاح".
وأضاف:"مفيش حد أبدا سعيد بالنتائج، وده كان واضح جدًا في بيان النادي إن في عملية إصلاحات كبيرة هتتنفذ الفترة الجاية، وطبيعي في أي منظومة في العالم، نادي أو شركة أو أي مكان فيه ضغوطات مستمرة يحصل أخطاء نتيجة الضغط ده، الإنسان بطبيعته طول ما هو مضغوط ممكن يغلط، الشطارة إن الأخطاء تبقى قليلة ويتم تداركها سريعًا".
وأوضح:"وأعتقد إن حجم البطولات والإنجازات في الـ8 سنوات أكبر بكتير من حجم الإخفاقات، وده حالنا كنادي الأهلي مش بنقبل الإخفاق، وده سبب النجاح المستمر، لكن ممكن يبقى سبب أحيانًا في أخطاء، الضغط المستمر اللي بيولد أخطاء مش بس على الإدارة، ممكن كمان يكون على المدربين واللاعبين، ممكن الاختيار فنيًا يكون سليم لكن قدرة المدرب أو اللاعب على استيعاب حجم المتطلبات والضغوط تبقى ضعيفة، وده بيحصل وطبيعي، وشوفناه مع لاعبين كتير سواء لم ينجحوا أو قدرتهم على العطاء في أعلى مستوى مكنش فيها استمرارية طويلة، وممكن يخسرنا مدربين ولاعبين ممتازين بسبب حرصنا المستمر على عدم الإخفاق أو إعطاء فرص".
وتابع:"النادي الأهلي بيستمد قوته من جمهوره، محتاجين الجمهور يبقى كله على قلب راجل واحد، وهنا مش قصدي الإدارة، قصدي النادي، مش عايزين خناقات أو تنمر على لاعيبة، مش عايزين خناقات فنية على لاعبين عشان انتصار لوجهة نظر وحب وكرة، اللي بيلعب راجل إحنا كلنا في ضهره، عايزين نبص على الكورة ككورة وكلنا نبقى وحدة واحدة، عندنا مشكلة في المدرج اتكلمت عليها".
وأشار إلى أن:"كمية الرسائل والشتيمة اللي جتلي مش طبيعية، بس أكدتلي حاجة واحدة إن ده ملف مهم جدًا وحساس جدًا، والله ما حد مقصر، في بس رواسب ومشاكل محتاجة وقت وثقة من الجميع، مش مهم مين يبقى موجود، مش مهم المسمى، كلنا جمهور الأهلي".
وأكمل:"من أيام ما كانت التالتة دي هي التانية دلوقتي، من أيام عم حسين ربنا يرحمه، لا كنا بنقول مين بيقودنا، ولا كان في دماغنا حاجة غير التشجيع، وكنا بنتضرب من الأمن المركزي بالخرزانات كل ماتش وبتعدي، بس للأسف كله نسي الأيام دي".
وواصل:"الأهلي كبير وكبير أوي، وطالما اخترنا كلنا إن طموحنا يبقى ملوش حدود، يبقى لازم نفهم إن ممكن ده يسبب أخطاء، وتاني مش بتكلم عن إدارة بس، بتكلم على لاعيبة ومدربين وعلى الجمهور كمان، لأن طموحنا الكبير ده خلانا مش بنعرف نفرح عشان دايمًا باصين لفوق أكتر".
وأردف:"أنا في الآخر جمهور وطالع من المدرج، وربنا يعلم أنا بحب الأهلي قد إيه، وشايف إن كلنا لازم على قد ما نضغط، يبقى دايمًا ضغطنا إيجابي ويبقى دايمًا عامل نجاح".
وشدد:"هنرجع؟ أكيد هنرجع إن شاء الله، النادي الأهلي منظومة مش بتعرف الفشل، حصل تراجع؟ أكيد حصل وبيحصل، والتاريخ بيقول كده، والعكس على قد ما ضغط الجمهور صعب، لما الضغط زاد في السنين الأخيرة، العودة بتبقى أسرع بكتير، شوفنا زمان فترات تراجع أطول وأوحش لما الضغط كان أقل".
واختتم:"اسم الأهلي زي الجبل ما يهزه ريح، طول ما الكل حاطط اسم الأهلي قدامه".
اقرأ أيضا
التعليقات السابقة